Vuostevurolašvuođat

12.2.-30.5.2021 

Vuostevurolašvuođat -čájáhusa dáiddárat ovdanbuktet kritihkalaččat servodaga ráhkadusaid ja daid stivrejeaddji árvvuid. Čájáhus lea oassi Artsi servodatlaš čájáhusaid ráiddu.

Vuostevurolašvuohta vuođđuduvvá vuorrováikkuhussii, mas guktot oassebealit árvvus atnet ja gudnejahttet nuppi nubbi.

Artsi čájáhus čohkke oktii dáládáiddáriid ja dáiddadujiid, mat gieđahallet min servodaga váldegaskavuođaid, geavadagaid ja vuogádagaid. Dát ráhkadusat meroštallet olmmošjoavkkuid dahje ovttaskas olbmuid dan mielde, man bures sii vuogáiduvvet ráđđejeaddji norpmaide.

Čájáhusa temát oidnojit olbmuid eallimis ovdamearkka dihte dearvvašvuođafuolahusas, barggus ja árggas. Geas mii leat sorjavaččat? Geas lea váldi mearridit midjiide laktáseaddji áššiin ja mo mearrádusat váikkuhit min eallimii? Mii lea norbma? Čájáhusa duogážis lea dálá spiehkastatáigi, mii lea bohciidahttán ain eanet dákkár gažaldagaid.

Caroline Suinnera dávvirinstallašuvnnat sisdollet earret eará dálkkascirgganasaid, -tableahtaid ja bođudiamánttaid. Ovttas atnubiergasiin nugo gápmagiin, dat čalmmustahttet dovdduid ja árgga doaimmaid dilis, mas buohcuvuohta lea eallima guovddážis. Mo gávdnat vugiid leat ja eallit go goruda doaibmannávccaid galgá bajásdoallat dálkasiiguin?

Antti Eskelinen sárgosat gieđahallet bargguhis olbmo árgabeaivvi ja veajuiduhtti barggu. Mo servodaga mekanismmat doaibmagohtet go olmmoš ii leat servodaga čalmmiin produktiiva dahjege ii vástit bargoaddi vuordámušaid? Nayab Noor Ikrama interaktiiva, rabaskántuvrra áđđestalli installašuvdna addá museaguossi ságastallat dihtora dahkujirpmiiguin.

Harold Hejazi hiphop-fantasiija muitala Helssegis ássi fiktiivvalaš Harriharri eallimis. Harriharri lea easka fárren Supmii ja sus leat stuorra vuordámušat. Rehálaš rahčamis fuolatkeahttá son vásiha suopmelaš servodahkii vuogáiduvvama váttisin. Vai son vuoitá spealu hástaleaddji dásiid, son ferte dáistalit byrokratiija ja olgguštuvvama vuostá.

Mátkkis suopmelaš servodaga lahttun muitala maiddái Sepideh Rahaa. Rahaa, guhte ássá Vantaas ja lea Iranis eret, muitala iežas dáiddadujiin sierra kultuvrraid deaivvadeamis, sosiála norpmain, dábiin ja nissonvuođas suomagillii, eaŋgalsgillii ja farsagillii.

Historjjálaš geahččanguovllu čájáhussii fállá Lauri Astala pseudodiehtagii vuođđuduvvi installašuvdna ja Ali Akbar Mehta ja varialambo ollisvuohta, mii gieđahallá spiehkastatáiggiid jagis 3000 oáá. dán beaivvi rádjai.

Váldooassi čájáhusa dáiddadujiin leat ođđa. Mielde čájáhusas leat Matti Aikio, Lauri Astala, Jessie Bullivant, Antti Eskelinen, Harold Hejazi, Nayab Noor Ikram, Ali Akbar Mehta ja varialambo (Varia Sjöström, Hatz Lambo), Aleksi Pietikäinen, AnnaLeena Prykäri, Sepideh Rahaa ja Caroline Suinner.