Duohtaáššiin ovdanbukton dilli

Duohtaáššiin ovdanbukton dilli 23.9.2022-12.3.2023 

Duohtaáššiin ovdanbukton dilli lea guovtti dáiddára, Diego Bruno ja Minna Henrikssona, vuosttaš oktasaščájáhus Vantaa dáiddamusea Artsis. Helssegis bargi Diego Bruno ja Minna Henriksson váikkuheaba maiddái riikkaidgaskasaš dáládáiddagiettis.

Čájáhusas dáiddárat dárkkodeaba iežaska dujiid bokte positiiva vuođđooainnu ja searvvušlaš čatnaseami. Čájáhusa namma čujuha dikkis geavahuvvon láhkalaš terbmii, mii govvida doppe gieđahallon áššái laktáseaddji duohtaáššedieđu – lei dat dasto ášši dáfus positiiva dahje negatiiva.

Čájáhusa dáiddáriid ovttastahttá dat, ahte goabbáge dáiddalaš bargu vuođđuduvvá nannosit dutkamuššii, arkiivabargui ja ovttasbargui. Soai buktiba iežaska dáidagis ovdan marginálahistorjjáid, strukturálalaš rasismma ja politihkalaš dáistalemiid. Sudno barggus báikkálašvuohta, politihkalaš gurutvuohta ja fašismma vuostálastin leat dehálaččat.

Minna Henriksson lea ráhkadan čájáhussii guokte ođđa dáiddaduoji, mat hábmejit dialoga historjjá ja dán beaivvi gaskii. Nubbi dain laktása ruoššalaš avantgardedáiddár Ivan Kljuna (1873–1943) abstrákta duoji vearisteapmái. Dan lassin mielde lea ollisvuohta, mii muitala eatnanvuloš vuostálastimis ja soahtegárgolaččain nuppi máilmmisoađi áigge erenomážit Vantaas ja Myyrmäkis.

Diego Bruno videoduodji ja čuovgagovat gieđahallet Bolivia politihkalaš lihkadusa jagiin 2003–2019. Bruno dutká iežas dujiin dan, mo politihkalaš dáistaleami vásáhusa lea veadjemeahttun ollislaččat fáhtet, dannego vásáhusa muitaleamis báhcá álo juoidá eret. Dáid lassin čájáhusas leat sárgosat ovdalis álgán ráiddus Interruptions.